Telecomunicaciones diz que nun realizó nengún espediente sobre Radio Sele

Telecomunicaciones diz que nun realizó nengún espediente sobre Radio Sele

DAMIÁN BARREIRO. UVIÉU - 27/10/2011 A LES 13:26:05

José Antonio Díez Menéndez, director de la Xefatura Provincial de Telecomunicaciones, afirmó en declaraciones a LES NOTICIES.COM que dende esta entidá nun fixeron nengún espediente sobre Radio Sele «nin ordemos el cierre de nada». Díez Menéndez señaló que lo único que fixeron foi preguntar al dueñu del inmueble onde taba asitiada l'antena quién yera'l propietariu de la emisora, «esta ye la única actuación que fixo esta Dirección Provincial».

Les declaraciones del reponsable de Telecomunicaciones n'Asturies, organismu dependiente del Ministeriu d'Industria, Turismu y Comerciu, vienen depués de que Radio Sele tuviera que desmontar na tarde del 25 d'ochobre l'antena emisora asitiada nel barriu uviedín. La decisión de los responsables de la cadena vieno depués de que la comunidá onde ta puesta l'antena recibiera una carta de la dirección de la Xefatura Provincial de Comunicaciones informando a los vecinos del edificiu que la radio n'asturianu ta emitiendo con una antena puesta de manera illegal, polo que tuvo que retirase del edificiu o la comunidá tendría que facese cargu d'una multa de 500.000 euros.
Sicasi, Díez Menéndez diz qu'ellos nun saben quién ye'l responsable de Radio Sele y que tienen la obligación de controlar l'usu del espectru radiofónicu y averiguar quien lo ta usando y si tien o autorización pa ello. «Esti ye'l nuestru trabayu, igual que la policia investiga si una actividá ye llegal o non», indica.
Por eso, esplica que dende Telecomunicaciones «fiximos esto y lo que faiga la Inspección Xeneral nun ye dalgo que vaigamos publicar na prensa». Díez Menéndez diz qu'hai unes normes qu'hai que cumplir y que'l que dirime si se cumplen o non ye la Dirección Xeneral de los Servicios, que ta en Madrid. «Nós nun controlamos, namás averiguamos y comprobamos quién ye'l responsable de les emisiones y informamos a la autoridá compotente», anque añade que cómo realicen esti llabor «nun tien muncho sentíu falalo cola prensa».