RADIO SELE 106.5 F.M.

Entrevista

FALAMOS CON: XUAN XOSÉ MARIÑO, COORDINADOR DE RADIO SELE, SOBRE L'ANULACIÓN DE LA LLICENCIA COMERCIAL POR PARTE DEL GOBIERNU D’ARECES.
F -XUANXO ¿CUÁNDO ENTAMA TOO ESTO?
XX- A últimos del añu 97 presentámonos a la convocatoria de concesiones d'emisores de FM. De primeres atalantamos que too diba ser normal y camentábamos que siguiendo les bases podíamos facer un gran proyeutu. Hai que dicir que fiximos el meyor proyeutu de radio, según la comisión de valoración, de tolos que se presentaron. Un proyeutu seriu y viable. Pero agora vemos que nun fai falta nada d'eso. Namái ye necesario ser collaciu de dalgún políticu socialista o asociase cola SER de Blas Herrero o al Grupu Z. El proyeutu ye lo de menos. Esta xente lo único que quier son medios de propaganda, non d'información.
F- FOI LLARGU ESTI PROCESU, ¿VERDÁ?
XX- Sí, infinitu. Esa ye la verdá. Son munchos años de velea constante, esperando la decisión final, sabiendo qu'esta yera una gran oportunidá pa la cultura asturiana. Poro, cuando'l gobiernu de Sergio Marqués concedió la llicencia camentamos qu'agora yera l'intre d'entamar a trabayar en serio y qu'el gobiernu valorara'l proyeutu. Pero a partir de la concesión, nel mes de xunetu de 1999, entamó la velea. Ensin nenguna información de lo que pasaba, namái salía'l Direutor de Telecomunicaciones nel periódicu diciendo qu'había munchos erros nes actes, y al paecer, como vimos, nun había tantos erros, sólo debía ser l'acta de RADIO SELE onde los había. Y ye que tuvieron dando vueltes pa ver cómo se facía esto y nun pillase los deos yá que nun hai precedentes nel Estáu español. Amás, dieron tiempu a que los grandes, como SER, Blas Herrero, etc tomaren posiciones y s'asociaren coles nueves concesiones.
F- ¿Y QUE PASÓ DENDE QUE LLEGA'L PSOE AL PODER N’ASTURIES?
XX- Mira, siempre atalanté qu'el PSOE ye'l partíu que más dañu fizo al país. Ye un partíu podre de corrupción y paezme que nun hai remodelación posible de partíu. Creo que los que tamos en medios de comunicación debemos d'echar a esta xente del poder. Nun podemos permitir qu'Asturies mantenga por más tiempu a estos nefastos personaxes. Y sigo falando de la radio, cuando'l PSOE ganó les elleiciones dixo'l presidente Areces que la concesión de llicencies por parte de Marqués fuera llexítima pero non ética. Claro lo que quería yera concedeles elli. Poro, a partir d'esi momentu entama la desinformación pa los interesaos y les visites, pa comprar les llicencies, del direutor de les emisores n'Asturies de Blas Herrero., llamáu Willy, que con esi nome yá vos podeis imaxinar.Tamién foi tiempu de les llamaes de diferentes cadenes pa comprar les llicencies nueves y nós fuimos los únicos que nun accedimos a esto, y yá ves el castigu.
F- ¿Y TUVO QUE VER L’ASTURIANU?
XX- Sí, claro. Yá sabes el enfotu que tien el PSOE cola llingua asturiana y la so cultura. Tien enfotu en facela desapaecer. El presidente enxamás apaez nun actu onde te presente l'asturianu. Eso sí, pues velu en cualesquier inaguración de lo que seya. L'asturianu foi otru de los puntos a la escontra, y eso ye surrealista.
F-¿QUÉ IRREGULARIDAES FUERON LES MÁS NOTABLES NA REAXUDICACIÓN?
XX- Fueron toes notables, pero les más importantes fueron que dalgunes llicencies camudaron nesti tiempu hasta tres vegaes de dueñu. Qu'al periodista asturianu Carlos Vigón, que yera'l dueñu de Radio Nalón pónen-y CINCUENTA MILLONES de multa por entamar a emitir cola nueva llicencia que se-y concediera en Villaviciosa. Y vemos como'l Grupu Z n'Avilés lleva varios meses emitiendo y nun pasa un res. Ye más, confirmen agora na reaxudicación que siga emitiendo. Carlos Vigón vese obligáu a vender Radio Nalón pa pagar la multa y a vender les dos emisores a la Cadena SER. Na concesión de la  llicencia de Villaviciosa taba firmáu un documentu que dicía que Carlos Vigón comprometíase a nun vendela hasta dientru de diez años  y que la comisión valoró con cinco puntos. Pero la SER ye la SER y la llicencia de Xixón, que fuera concedida al Grupu Alsa, desfízose d'ella. Presintiendo lo que s'avecinaba, pasó a otra empresa y finalmente a Blas Herrero, esi personaxe al que'l PSOE regaló fai 10 años SESENTA emisores.
F-¿ CÓMO VES EL FUTURU A PARTIR D’AGORA?
XX- Falta la decisión del Xulgáu que nel mes d'agostu taba estudiando'l nuesu espediente. Veremos cual va ser el fallu. Agora tenemos un mes pa recurrir margar tovía nun permitieron ver l'acta, polo que pongo en dubia qu'hubiera tal comisión de valoración y sabemos qu'el recursu nun va valir pa nada. Quédamos nuevamente'l Xulgáu y la publicidá que deamos a esti tema. Tengo enfotu nel futuru.
F –¿SIGUIRÁ EMITIENDO RADIO SELE?
XX- Sí, claro. Una cosa ye RADIO SELE llibre y otra RADIO SELE comercial. Son dos medios estremaos. Esto danos puxu pa siguir gracies a tolos collacios y collacies que nos sofiten. La radio siguirá siempre, pase lo que pase, pero agora ye un bon momentu pa reflexonar en qué puntu nos atopamos políticamente y facer lo que  pruya pa camudar les coses. Como dicía enantes, nun podemos perder más tiempu.

Siguiente
Menú

© Radio Sele 2001